KINSLEY REPORT 1
— Ezkonduta nagoen? Bai. Horrek esan nahi du aktaren bat bete zela inoiz bulegoren batean eta horitu egin zela denborarekin eta izan zela elizkizunen bat ere nonbaiten aitabitxi, amabitxi eta guzti. Eta oturuntza, eta astebeteko egonaldia Acapulcon.
Ez, dagoeneko ezin dut nire ezkongai arropa jantzi. Umeekin, kezkekin, pisuan ez nahiz lehengoa. Ikusten duzu, ez da horien faltarik.
Sarri, aurrez ikusten dut gainera, senarrak bere eskubideaz baliatzen da, edo berak deitu gogo duen bezala, ordaindu egiten du ezkontza-zorra. Eta atzea ematen dit. Eta zurrunga egiten du. Ni mukertu egiten natzaio. Lotsagatik. Baina, ia beti, amore ematen dut. Esana egiteagatik.
Ez, ez dut gustuko. Edonola ere, ez nuke gustuko izan beharko, ni garbia naizelako, eta bera, berriz hain materiala!
Gainera, hor dago beste haurdunaldi baten kezka. Eta arnasa-hots ozen horiek eta ohearen kirrinkek iratzarri egin ditzakete umeak, eta gero ezin izaten dute ostera ere goizalde arte lo hartu.
2
Ezkongabea, bai. Baina ez birjina horregatik. Hamahiru urte nituela banuen lehengusu bat.
Berak hamalau zituen eta ez genekien ezer. Izutu egin nintzen. Zerbait eman zidan mediku batengana joan eta ez zen ondoriorik izan.
Orain mekanografoa naiz eta tartera lagunekin ateratzen naiz. Zinemara eta afaltzera. Motelen batean amaitzen dugu. Ama ez da enteratzen.
Hasieran lotsa ematen zidan, umiliagarria zitzaidan gero gizonek era horretan ikustea. Gogorik ez nuenean uka ziezadaten uko egiteko eskubidea putatzat nindutelako.
Eta ez dut kobratu ere egiten. Ezin dut neure apetarik ere bete ohean. Denak dira zera batzuk. Zergatik egiten dudan? Bakarrik sentitzen naizelako. Bestela izorra hadi!
Zeren eta, ez duzu zeuk ikusten? Zahartzen ari naiz. Galdu nuen ezkontzeko esperantza, eta nahiago dut beste orbanen bat edo beste memoria kutxa huts bat bezala izatea baino.
3
Dibortziatua. Besteak bezain mandoa zelako. Ezagutzen dut gehiago. Horregatik alderatzen dut.
Noizean behin hartzen dut arindu bat, histerika ez bihurtzeko.
Baina eredu izan behar dut alabentzat. Ez dut nahi haiek nik izan dudan adurra izan dezaten.
4
Jainkoari diot eskainia abstinentzia hau. Mesedez, ez gaitezen xehetasunetan sar!
Batzuetan amets egiten dut. Batzuetan isuri batean esnatzen naiz, eta ez zait erraza egiten aitorleari esatea, berriz ere, erori egin naizela, haragia ahula delako.
Utzi egin nion zinemara joateari. Iluntasunak lagundu egiten du, baita igogailuetako jendetzak ere.
Erotu egin behar nuela pentsatu zuten, baina mediku baten eskutan nengoen. Masajeak.
Orain hobeto nago.
5
Ezinbestekoak (hala dira beren ustez) lasai bota ditzakezu zakarretara, guk egin genuen bezala.
Laguna eta biok ondo konpontzen gara. Agintzen duena, ordainetan, gozoa da; esana egiten duena apaina den bezala, gainera, bere mendekutxoak ere hartzen ditu.
Jai askotara joaten gara; bidaiatu ere, sarri; eta hotelean gela eta ohe bakarra eskatzen dugu.
Barre egiten digute, baina geuk ere egiten dugu haien lepotik, eta enpazean horrela.
Bakarrik egoteaz aspertzen garenean biotako bat ume baten bila joango da.
Ez, horrela ez! Intseminazio artifizialeko laborategi batean.
6
Andereñoa. Bai, bai, andereñoa.
Gaztea naiz. Diotenez, itsusia ere ez. Eramangarria. Eta egunen batean Printze Urdina etorriko da, miraria eskatu baitiot San Antoniori. Orduan zoriontsuak izango gara. Beti maiteminduta.
Zer axola dio pobre izateak! Mozkorra bada, neuk kenduko diot bizioa. Andrezalea bada, hain erakargarri egongo naiz beti, hain gainean egongo naiz haren nahierara, hain etxekoandre on eta ama emankor eta hain sukaldari bikain izango naiz non nire merituen sari, tartean eta handiena daukadan pazientzia, fidel bilakatuko den.
Nire gurasoek eta senarrarenek bezalaxe, meza aranditsu batez ospatuko ditugu gure urrezko ezteiak.
Ez, oraindik ez dut senargairik izan. Ez, bakar bat ez oraindik. Bihar.
KINSLEY REPORT |