HIAZINTAREN PARTERREA MAIRULARROSA ANDEREA
Mairularrosa anderea ezkonberri galdekatzen senarra Zer urtetan gara? Zein hilabetetan? Zein astetan? Zenbat egun ditu egun? Zer orenetan gara? Eta senarrak erantzun Maiurrian gara lau osteguneko astea loriazko eguna eguerdi. Urte ederra, hilabete atsegina aste xarmagarria, egun zoragarria oren deliziusa.
ITSASOKO ERREGINA ZEN ANEMONA
Itsasoko erregina zen anemona erregina da oraino bistan da baina hain txipia galdu egin da. Galdu egin da itsasoaren hondoan oroit ditu bere diamantak ortzadarrean zintzilik ihintzetan zintzilik eta ostrek inguruan ahozabalka dizkiote perlak eskaintzen. Baina itsasoaren erregina zen anemona da larri ez da luzerako erregina burdinazko aingurak ausiki egin dio ankerki eta hil eginen da sarri.
SOPRANO AHOTSEKO LARROSA
Soprano ahotseko larrosa pianoaren gaua ari da interpretatzen. Horrek xarmatzen ditu mendiak eta ordokiak Rhin, Loira eta Sena eta laminak eta sirenak kanaberazko jauregietan. Soprano ahotseko larrosa ezaguna da Concarnon Fosse-Reposen eta Locarnon baita errebaletan ere Kovnon eta hondartza orotan Borneon eta artesitutako edozein xaton.
KAKTUS DELIKATUA
Kaktus delikatua mutil zangarra lukainka harrapatzaile ospetsua kaiku galanta orpozikina astapistola txotxo maltzurra bitxia rigoloa astapistola baita hain zuzen bitxia gorputzez bihurria basoetako almiranta urdelarruko jenerala hondar xehearen izua gormutuen tenorra baina horrek ez dizkio arazotxoak hobekitzen eta osasuna ere ez.
ARDOA EDATEN DUEN ZUHAITZA
Ardoa edaten duen zuhaitza gaitezen etzan eskaintzen itzala xarbotez eta konkonbrez elikaturik oreinak eta lapinak bezala.
Ardoa edaten duen zuhaitza sona handiko kamarada da ona gauerako eta ona goizerako eta egun oroz kabalkada.
Ardoa edaten duen zuhaitza aritu da goizean goiz ez dela aztia izan behar jakiteko ez dugula astearte egun oroiz.
Edaten duen zuhaitzak ardoa isurtzen du lurrean ihintz ahala ez da zabarra baizik bizkorra eta berea izanen da azken itzala.
Eta berea izanen da azken itzala lurraren gainean lurrik bada eta itsaso gainean eta lur gainean azken egunsentiaren aldaba.
BENGALAKO SALSIFIA
Bengalako salsifia baratzeko temosoa gaiztoa nola ezkabia ergela zelan zozoa
Bengalako salsifia suzko soinekoa jantzi eta bere esku zikinak larruetan, 1+1, 2
Bengalako salsifia tarta-zeru bat goian zigalek daramate haren ontzia atoian
Bengalako salsifia gerriko minak puskatzen Pekineko larrosaren petaloz da elikatzen
Bengalako salsifia ongi mutil sonatua alimaleko zirtzila gaizto dute onartua
Bengalako salsifia ez zaigu ez zuzen ari ospitalearen aurrean ari baitzaigu kantari
Bengalako salsifia ez hari eman ezkurra gose gorrian zelarik jan zuen bere zakurra
Bengalako salsifia egun bateko bizia krotalo batek zanpatua hila da oi hau patua
Bengalako salsifia jostetan zen belardian bere baloia du irentsi patxada harrigarrian
Bengalako salsifia lurrak beste iraun beharrez bere gaitzetik arrasortuz bere misteriotik hilez
Bengalako salsifia zuhurki da elikatu izar xuritan etzanda kirrixkilet bat klikatu
Bengalako salsifia zer hauta behar makurra lo hartzen badu amesgaiztoa esna bada bizi laburra.
HIAZINTAREN PARTERREA |