Poeta New Yorken
Federico Garcia Lorca

euskaratzailea: Juan Luis Zabala
Erein, 2003

 

EGUNSENTIA

 

New Yorkeko egunsentiak

lohizko lau zutabe ditu

eta ur usteletan plisti-plasta dabiltzan

uso beltzezko hurakan bat.

New Yorkeko egunsentiak

eskailera eskergetan orro egiten du

marraztutako angustiazko akaren

bila erpinen artean.

Egunsentia heldu eta inork ez du ahoan hartzen

han ez baita ez biharrik eta ez esperantza posiblerik.

Batzuetan txanponek erle-multzo suminduetan

haur abandonatuak zulatu eta irensten dituzte.

Irteten diren lehenek beren hezurrekin ulertzen dute

ez dela ez paradisurik eta ez amodio hostobakandurik izango:

badakite zenbaki eta legeen lohira doazela,

arterik gabeko jokoetara, fruiturik gabeko izerdietara.

Kateek eta zaratek estaltzen dute argia

sustrairik gabeko zientziazko desafio likitsean.

Auzoetan alderoka dabilen jende insomnioduna dago

odolezko naufragio batetik irten berritan bezala.

 

Poeta New Yorken
Federico Garcia Lorca

euskaratzailea: Juan Luis Zabala
Erein, 2003